Skotlandsferð 31.08- 08.09.2019 - UPPSELT!

 

Á slóðir Auðar djúpúðgu með Vilborgu Davíðsdóttur

Þríleikur Vilborgar Davíðsdóttur um landnámskonuna Auði djúpúðgu Ketilsdóttur, (Auður, Vígroði og Blóðug jörð), hefur notið fádæma vinsælda og hlotið einróma lof lesenda sem gagnrýnenda. Bækurnar segja frá uppvexti Auðar á Suðureyjum, stormasömu hjónabandi þeirra Dyflinnarkonungs, átökum norrænna manna á Bretlandseyjum og að endingu siglingunni frá Katanesi og yfir hafið til landnáms á Íslandi með viðkomu í Orkneyjum og Færeyjum.

Í þessari sögu- rútu- og ferjuferð gefst einstakt tækifæri á að ferðast um söguslóðir bókanna á Skotlandi í fylgd Vilborgar auk þess sem við kynnum okkur stórbrotna sögu hálanda Skotlands og 5.000 ára sögu Orkneyja. Ekið verður um fegurstu svæði Skotlands og siglt til Tiree (Tyrvist) og Orkneyja.

 

Kort_Bretavirki staðsetn_.jpg

 

Dagskrá

Laugardagur 31.08.19

Flogið til Glasgow með Icelandair. Ekið til Dumbarton Rock kastala (Bretavirkis/Dún Bretann). Kastalinn skoðaður. Að loknum hádegisverði í Dumbarton verður ekið til Loch Lomond. Þaðan liggur leiðin til Oban á vesturströndinni en þar verður gist fyrstu nóttina.

 

Sunnudagur 01.09.19

Dagurinn tekinn snemma því nú er haldið í siglingu til Tiree (Tyrvistar, heimaeyjar ættar Ketils flatnefs) með stuttri viðkomu á eyjunni Coll (Kolu). Deginum eytt í skoðunarferð um eyjuna og gist þar næstu nótt. Ferjuhöfnin á Tiree er í Scarinish sem lesendur bókanna þekkja sem Skarfanes, bústað Helga magra og Þórunnar hyrnu. 

 

Mánudagur 02.09.19

Siglt til baka til Oban. Þaðan er ekið norður til Fort William sem er við rætur Ben Nevis, hæsta fjalls Bretlandseyja. Gist í Fort William um nóttina.

 

Þriðjudagur 03.09.19

Ekið til Glenfinnan þar sem við kynnum okkur sögu Bonnie Prince Charlie, sem leiddi uppreisnartilraun Jakobíta 1745. Þaðan er ekið norður eftir Great Glen (,,Vatnaleiðin mikla") til Loch Ness þar sem við munum skoða hinn stórfenglega Urquhart kastala. Eftir hádegismat við kastalann er ekið til Burghead (Borgarhöfðavirkis í Vígroða). Þar verjum við dágóðri stund áður en ekið er til Tain, þar sem gist verður næstu nótt. 

 

Pettland kort.jpg

 

Miðvikudagur 04.09.19

Ekið norður til Kataness. Á leiðinni sjáum við vellina þar sem þing norrænna manna er háð í Vígroða við Lagavatn (Loch Loyal) undir Lagafjalli (Ben Loyal), Tungu (Tounge) og Þórsá (Thurso), jörð Auðar. Í Scrabster (Skarabólstað) tökum við ferjuna og siglum í kjölfar Auðar framhjá Hoy (Háey) til Stromness á Orkneyjum, þar sem Orkneyjarjarl bjó undir Varðhól. Við komuna til Orkneyja skoðum við steinaldarþorpið Scara Brae áður en haldið er á gististað í Kirkwall. Þar verður gist næstu 2 nætur.

 

Fimmtudagur 05.09.19

Fyrri hluta dagsins er varið í skoðunarferð á Orkneyjum þar sem við heimsækjum Standing Stones of Stennes (brúðkaupið á Steinarnesi í Blóðugri jörð), steinahringinn Ring of Brodgar, Maes Howe grafhauginn og ítölsku kapelluna. Að loknum hádegisverði í Kirkwall er frjáls tími þar sem hægt er að skoða sig um í bænum. Kostur gefst á að fara í heimsókn í viskíverksmiðjuna Highland Park fyrir þá sem það vilja.

 

Kort_Orkneyjar.jpg

 

Föstudagur 06.09.19

Ekið til Burwick þar sem við tekur ferjusigling yfir Pentlandfirth (Péttlandsfjörð) til John O´Groats. Þaðan er ekið til Buncansby Head (Dungaðsbær í Blóðugri jörð), Freswick (Þraðsvík) og Hill o´Many Stanes á leið okkar til Helmsdale. Þar er snæddur hádegisverður og síðan er ekið suður til Inverness (Nesárósar í Vígroða) þar sem gist verður næstu nótt. 

 

Laugardagur 07.09.19

Ekið frá Inverness til Glasgow með viðkomu í Pitlochry. Frjáls dagur í Glasgow. Gist í Glasgow síðustu nóttina í ferðinni.

 

Sunnudagur 08.09.19

Ekið til Glasgow flugvallar. Flug til Íslands með Icelandair laust eftir hádegið.

 

_____________________________________________________________________________________________

Fararstjórar: Vilborg Davíðsdóttir & Snorri Guðmundsson

_____________________________________________________________________________________________

 

Verð: £1,475

 

 

Innifalið í verði:

  • Gisting í 8 nætur með morgunverði í tvíbýli

  • Kvöldverður öll kvöldin (8 x)

  • 4 x hádegisverður (Dumbarton, Tiree, Helmsdale, Kirkwall)

  • Allur akstur í Skolandi samkv. dagskrá

  • Ferjusiglingar (Tiree & Orkneyjar)

  • Aðganseyrir í söfn og kastala (Dumbarton kastali, Uruqart kastali, Skara Brae, Maes Howe)

  • Íslensk fararstjórn

  • Skattar og gjöld í Skotlandi

Aukagjald fyrir einbýli £270.

 

Ekki innifalið:

  • Flug til og frá Skotlandi. Munum taka frá sæti með Icelandair fyrir hópinn þegar bókanir fyrir haustið 2019 opnast. Væntanlegt verð 35- 40 þúsund krónur. Hægt að nota vildarpunkta.

  • Ferðatryggingar

  • Hádegisverðir í ferju frá Tiree, Urquhart kastala, ferju til Orkneyja, Glasgow

 

Staðfestingargjald (óendurkræft) £150 greiðast við bókun (þó ekki fyrr en í byrjun júní nk.). Greiðsla fyrir flug greiðist til hópadeildar Icelandair 6 vikum fyrir brottför. Lokagreiðsla ferðar greiðist 5 vikum fyrir brottför.

 

UPPSELT ER Í FERÐINA OG LANGUR BIÐLISTI - EKKI ER TEKIÐ VIÐ FLEIRI BÓKUNUM