Hadrian´s Wall - 95 km gengnir á 5 dögum (2-3 skór)

Árið 122 AD fyrirskipaði Rómverski keisarinn Hadrian að reisa skyldi vegg stranda á milli í norður Englandi til að halda í skefjum Barbörunum í norðri.  Veggurinn (Hadrian's Wall) liggur frá Wallsend í austri (úthverfi Newcastle) til Bowness on-Solway í vestri. Rústir Hadrian's Wall eru stærstu fornminjar í Norður Evrópu.  Búið er að opna gönguleið meðfram veggnum sem nýtur sívaxandi vinsælda. Leiðin liggur um einhverjar fallegustu sveitir Englands. Á leiðinni eru 16 virkisrústir og 8 söfn, þannig að einstakt tækifæri gefst á að kynna sér sögu Rómverja á svæðinu.

 

Sunnudagur 7. júlí ´19: Koma

Flug FI440 með Icelandair klukkan 08:00. Lent á Manchester flugvelli klukkan 11:45 og þaðan er tekin lest til Carlisle. Eftirmiðdagurinn frjáls, þar sem hægt er t.d. að skoða Carlisle kastalann og rölta um í fallegum miðbænum. Gist er í miðborg Carlisle.

 

Mánudagur 8. júlí ´19: Carlisle - Walton

Gengið frá Carlisle til Walton. Þægilegur dagur í göngu á flatlendi. Veggurinn er lítið sýnilegur á þessari dagleið. Frá Walton er stutt keyrsla til Brampton sem er 400 manna huggulegur smábær. Þar er gist um nóttina.

Ganga: 20 km

 

Þriðjudagur 9. júlí ´19: Banks - Twice Brewed

Stuttur akstur frá Brampton til Banks. Þaðan er gengið til Twice Brewed sem er okkar næsti gististaður. Veggurinn er sýnilegur á löngum köflum, skemmtileg dagleið um hóla og hæðir þar sem margt athyglisvert er að sjá og skoða. Vindolanda Fort er stórmerkilegt safn og virkisrústir rétt við gististaðinn.

Ganga: 23 km

 

Miðvikudagur 10. júlí ´19: Twice Brewed - Chollerford

Fyrri hluti dagleiðarinnar er um hóla og hæðir meðfram veggnum en seinni hlutinn meðfram vegum á engjum og túnum. Stoppað verður við Housesteads Fort og virkisrústirnar þar skoðaðar. Ekið frá Chollerford til Hexham, sem er gamall markaðsbær við Tyne ána. Þar er gist um nóttina.

Ganga: 20 km

 

Fimmtudagur 11. júlí ´19: Chollerford - East Wallhouses

Ekið frá Hexham til Chollerford. Gengið á flatlendi um fagrar sveitir Englands. Þægilegur göngudagur þar sem staldrað verður við á huggulegri testofu og 2 sveitakrám, þ.a. þessi dagur er hálfgert pöbbarölt. Endað á Robin Hood sveitakránni í East Wallhouses. Þaðan er ekið til Hexham, þar sem gist verður um nóttina. 

Ganga: 16 km

DSC02716.JPG

 

Föstudagur 12. júlí ´19: Heddon-on-the-Wall - Newcastle

Keyrt frá Hexham til Heddon-on-the-Wall. Gengið frá Heddon-on-the-Wall til Newcastle. Síðasti dagurinn er þægilegur í göngu - gengið niður hlíðarnar frá Heddon að Tyne ánni og gengið meðfram henni sem leið liggur til Newcastle. Gönguferðin endar í miðborginni og fagnað verður leiðarlokum við Millenium brúnna. Gist í miðborg Newcastle.

Ganga: 16 km

 

Laugardagur 13. júlí ´19: Edinborg

Keyrt er um morguninn til Edinborgar og þar er frjáls eftirmiðdagur og kvöld. Gist er í Edinburgh Park sem er í ca. 10 mín í lest frá miðborginni.

 

Sunnudagur 14. júlí ´19: Heimferð

Flug með Easyjet EZY6941 frá Edinborgar flugvelli klukkan 07:00 til Íslands. Lent í Keflavík klukkan 08:30.

 

 

Verð: £820

 

Innifalið í verði ferðar:

Gistingar með morgunverði, nesti á göngudögum, drykkur á kynningarfundi á komudegi, farangursflutningur (1 taska - MAX 20 kg), kort af leið, akstur á göngudögum (sjá dagskrá), akstur frá Newcastle til Edinborgar. Íslensk fararstjórn alla daga.

Verð miðast við tvíbýli - aukagjald fyrir einbýli er £230

Ekki innifalið:

Flug og ferðatryggingar. Lest frá Manchester Airport til Carlisle (en hægt að kaupa lestarmiða hjá okkur) og leigubíll á Edinborgar flugvöll.

Flug

Hægt er að bóka flug til Manchester hjá Icelandair: https://www.icelandair.com/is/

Hægt er að kapa flug frá Edinborg til Keflavíkur hjá Easyjet: https://www.easyjet.com/en/

Eins getur fólk verið lengur í Skotlandi og farið heim með WOW frá Edinborg eða með Icelandair frá Glasgow

Staðfestingargjald (óendurkræft) £150 greiðast við bókun.

Lokagreiðsla ferðar greiðist 5 vikum fyrir brottför.