Ökum í um 45 mínútur að Matka-gljúfri, einni fegurstu náttúruperlu Norður-Makedóníu. Þar förum við í bátsferð um gljúfrið og siglum eftir kyrrlátu vatni Matka-stöðuvatnsins, umkringd háum klettaveggjum og grónum fjallshlíðum. Að bátsferð lokinni göngum við eftir fallegum göngustíg meðfram gljúfrinu til baka að upphafsstaðnum. Á leiðinni gefst tækifæri til að njóta þessa stórbrotna náttúrusvæðis frá öðru sjónarhorni.

Við stoppum síðan í hádegisverð á veitingastað í nágrenninu áður en við höldum ferðinni áfram til suðvesturs, í átt að Ohridvatni. Leiðin liggur um fallegt og fjöllótt landslag vesturhluta Norður-Makedóníu. Við komuna til Ohrid tékkum við inn á Hotel Unique 5* þar sem við gistum næstu 3 nætur.

Ekið stutta leið að Sveti Stefan, þar sem við hefjum fallega gönguferð meðfram Ohridvatni í átt að miðbæ Ohrid. Á leiðinni njótum við stórkostlegs útsýnis yfir vatnið og umhverfið. Þegar komið er í gamla bæinn hittum við staðarleiðsögumann sem leiðir okkur um sögulegar götur Ohrid.

Við skoðum Samúelsvirkið (Samuel’s Fortress), heimsækjum nokkrar af sögufrægum kirkjum bæjarins og kynnumst ríkulegri menningararfleifð hans. Meðal þess sem við sjáum er hin fallega Jóhannesarkirkja í Kaneo (Church of St. John at Kaneo), sem stendur á kletti ofan við Ohridvatn og er eitt þekktasta kennileiti Norður-Makedóníu. Að skoðunarferð lokinni er síðdegið frjálst. 

Ekið 10 mínútur að Sveti Stefan, þar sem gönguferð dagsins hefst. Við göngum upp í Galičica-þjóðgarðinn, í hlíðunum ofan við Ohridvatn. Leiðin liggur um skóglendi, opin engi og lítil, hefðbundin þorp. Göngunni lýkur í þorpinu Velestovo, sem stendur í hlíðum Galičica-fjallsins. Þar snæðum við hádegisverð á notalegum veitingastað með stórkostlegu útsýni yfir Ohridvatn. 

Eftir hádegisverð er ekið til baka á hótelið. Síðdegið og kvöldið eru frjáls til að njóta gamla bæjarins í Ohrid á eigin vegum.

Tékkum út af hótelinu og ökum í átt að Albaníu. Við förum yfir landamærin við Qafë Thanë og höldum áfram til Tirana, hinnar líflegu höfuðborgar Albaníu.

Fyrsti viðkomustaðurinn verður Dajti-fjall, sem rís yfir borginni. Við förum með Dajti Ekspres-kláfnum upp fjallið og njótum stórkostlegs útsýnis yfir Tirana. Á fjallinu gefst tími til að njóta útsýnisins og snæða hádegisverð á veitingastað með fallegu útsýni yfir borgina og fjöllin í kring.

Eftir að hafa farið aftur niður með kláfnum höldum við á hótelið okkar í Tirana, Hotel Collosseo 4*, en þar munum við gista næstu 2 nætur. 

Ekið til Krujë, sögufrægs bæjar sem stendur í fjallshlíðum norðan við höfuðborgina. Krujë er nátengd þjóðhetju Albana, Skanderbeg, sem leiddi andspyrnu gegn Ottómanaveldinu á 15. öld. Gengið um hæðirnar ofan við Krujë, þar sem fallegt útsýni er yfir nærliggjandi sveitir. Síðan tekur frjáls tími  þar sem hægt er að heimsækja Krujë-kastalann og Skanderbeg-safnið, þar sem saga þjóðhetjunnar og miðaldasaga Albaníu er rakin Einnig gefst tími til að skoða hinn heillandi gamla markað, sem er þekktur fyrir hefðbundið handverk, antíkverslanir og fjölbreyttan minjagripavarning.

Ökum síðan til Miðjarðarhafsstrandar Albaníu. Tékkum inn á Hotel Melia Durres 5* þar sem við gistum síðustu 2 næturnar í ferðinni.

Í dag er frjáls dagur til að slaka á og njóta aðstöðunnar á strandhótelinu. Hægt er að nýta sundlaugarnar, heilsulindina og aðra aðstöðu hótelsins.

Fyrir þá sem vilja hreyfa sig og skoða nágrennið verður boðið upp á gönguferð meðfram ströndinni. Á leiðinni verður stoppað á kaffihúsi við sjávarsíðuna þar sem hægt verður að fá sér kaffibolla áður en gengið er aftur á hótelið.

Þeir sem enn eiga næga orku geta einnig tekið þátt í skemmtilegri hernaðarlegri líkamsræktaræfingu undir stjórn leiðsögumannsins Rok. Þar verður notast við eigin líkamsþyngd og áhersla lögð á hreyfingu og skemmtilega samveru.