Ekið í suðurátt til eyjarinnar Moster, sem er einn mikilvægasti staður í kristnisögu Noregs. Samkvæmt Heimskringlu Snorra Sturlusonar steig Ólafur Tryggvason Noregskonungur þar á land árið 995 og lét reisa kirkju. Hann beitti sér fyrir kristnitöku Noregs og hafði einnig mikil áhrif á kristnitöku Íslands árið 1000. Á Moster munum við skoða menningar- og fræðasetrið Moster Amfi. Í fylgd staðarleiðsögumanns munum við skoða gömlu kirkjuna í Moster, eina elstu steinkirkju Noregs, kynna okkur sögu kristnitöku í Noregi og einnig 10.000 ára sögu námuvinnslu svæðisins.

Frá Moster ökum við síðan til Haugesund, en þar munum við gista næstu 2 nætur ferðarinnar á Quality Hotel Maritim, Haugasund ****.

Ekið stutta vegalengd til eyjarinnar Karmoy. Þar ætlum við að heimsækja sögusetrið á Ögvaldsnesi (Avaldsnes). Ögvaldsnes er sögufrægur staður og er elsta konungssetur Noregs. Staðurinn var mikilvæg valdamiðstöð í um 3.000 ár. Margir norskir konungar dvöldu á Ögvaldsnesi og Snorri Sturluson heimsótti staðinn á 13. öld. Þar er sögusafn og endurgerður víkingabær þar sem hægt er að kynnast lífi fólks á víkingaöld. 

Að heimsókn lokinni ökum við til baka til Haugasunds þar sem við snæðum hádegisverð á veitingastað í miðbænum. Síðan ökum við að Haraldshaugen sem er einn merkasti minnisvarði í Noregi.  Þar munum við skoða okkur um áður en við ökum til baka á hótelið.

Að morgni er ekið í norðaustur frá Haugasundi og stoppað við Langfossen við Akrefjörd. Fossinn er 612 metra hár og þykir einn glæsilegasti foss landsins. Síðan er ekið áfram til Tyssedal, en þar verður stoppað til að snæða hádegisverð.

Næsti viðkomustaður er Voss Folkemuseum, áhugavert byggðasafn í bænum Voss. Safnið var stofnað árið 1917 og er staðsett á bænum Mølstertunet, þar sem varðveitt eru 16 gömul timburhús, sum þeirra frá 16. öld. Húsin standa enn á sínum upprunalega stað og gefa góða mynd af daglegu lífi norskra bænda fyrr á öldum. 

Ökum síðan til Stalheim, en þar munum við gista næstu nótt á Stalheim Hotel ****.

Ekið til Borgund, en þar munum við skoða Borgund stafkirkjuna, sem er ein frægasta og best varðveitta stafkirkja Noregs. Hún var byggð úr timbri árið 1180 og er þekkt fyrir glæsilegt þak með mörgum burstum og útskornum drekahöfðum sem minna á víkingaöldina. Hún er ein af aðeins 28 stafkirkjum sem varðveist hafa í Noregi, en á miðöldum voru þær líklega yfir þúsund. Síðan er ekið í gegnum Kaupanger sem var mikilvægur verslunarstaður á víkingaöld á leið okkar að Norska jöklasafninu við Fjærlandsfjörð.  Þar munum við hafa frjálsan tíma til að skoða safnið og snæða hádegisverð. 

Lokaáfangastaður dagsins er Förde þar sem við munum gista næstu nótt á Förde Hotel ****.

Ekið suður á bóginn, um heimaslóðir landnámsmannsins Ingólfs Arnarsonar og áfram til Eyvindvíkur, þar sem Gulaþing var haldið til forna. Það var eitt elsta og mikilvægasta þing Noregs og á sér sögu allt til níundu aldar. Þar komu saman fulltrúar bænda til að setja lög, leysa deilumál og kveða upp dóma. Lög þingsins, Gulaþingslögin, eru meðal elstu varðveittu lagatextum Norðurlanda og höfðu áhrif á þróun norsks réttarkerfis. Gulaþing er einnig talið hafa haft áhrif á íslenska þinghefð, enda komu margir landnámsmenn Íslands frá Vestur-Noregi. Þar munum við snæða þjóðlegan hádegisverð og fá leiðsögn um svæðið í fylgd heimamanns.

Síðan er ekið til Bergen þar sem gist verður á Radisson Blu Royal Hotel Bergen **** síðustu 2 næturnar í ferðinni.

Frjáls morgunn í Bergen. Laust eftir hádegi er ekið til Bergen flugvallar.

Flug FI335 kl. 15:20. Lending í Keflavík kl. 15:50