Við byrjum morguninn á notalegri göngu meðfram vatninu inn til Bardolino. Gangan tekur um 30 mínútur.

Við kynnum okkur bæinn og njótum fegurðarinnar sem þar er að finna. Að því loknu gefst frjáls tími til að skoða sig um og setjast niður á einum af mörgum veitingastöðum bæjarins.

Síðan höldum við aftur á hótelið og eigum notalegan seinni part saman með sundleikfimi og samverustund.

Við eigum dásamlegan dag í vændum í Parco Sigurtà! Við byrjum á lestarferð um þennan víðáttumikla og fallega garð og spreytum okkur svo á að búa til ítalskt pasta.

Að því loknu njótum við ítalskrar máltíðar saman og skálum í víni frá Bardolino-héraðinu. Síðan gefst frjáls tími til að rölta um garðinn og njóta fegurðarinnar í rólegheitum.

Síðdegið er frjálst fram að kvöldmat.

Í dag höldum við til hinnar fallegu Verona, einnar rómantískustu og sögufrægustu borgar Ítalíu. Ferðalagið tekur um 40 mín. Þar tekur á móti okkur innlendur fararstjóri sem leiðir okkur um borgina, sýnir okkur helstu perlur hennar og segir frá sögu, mannlífi og menningu.

Verona heillar með fallegum torgum, þröngum götum og glæsilegum sögulegum byggingum. Borgin er meðal annars þekkt fyrir hið forna Arena di Verona og auðvitað söguna um Rómeó og Júlíu, sem hefur gert Verona að borg ástarinnar í hugum margra.

Að gönguferðinni lokinni fáum við frjálsan tíma til að skoða okkur um og njóta borgarinnar.

Í dag ætlum við að sigla frá Bardolino til Sirmione, einnar af perlum Gardavatns.

Þessi fallegi bær stendur á mjóum skaga sem teygir sig út í vatnið. Sirmione er þekktur fyrir tilkomumikinn miðaldakastala, þröngar götur og leifar fornrar rómverskrar villu. 

Á lokakvöldinu klæðumst við bleiku og förum saman út að borða á veitingastað.

Rúta frá hóteli kl. 10:30. Flug FI 937 kl. 16:30 og lent kl. 18:45.