Ferðaáætlun
Sérstök upplifun í franska vínhéraðinu Alsace
Flug FI568 með Icelandair kl. 07:20 og lent í Zurich kl. 13:05. Fararstjórar taka á móti hópnum á Zurich flugvelli. Ekið rúmlega 2 klst. til Riquewhir, en þar er gist í 7 nætur á Hotel De La Couronne.
Sameiginlegur kvöldverður í Riquewhir.
Gengin hringleið frá hótelinu um vínekrur í gegnum Hunawihr á leið okkar til Ribeuville sem er eitt af þessum gullfallegu miðaldarþorpum í Alsace.
Gamli miðbærinn er einstaklega vel varðveittur með sínum litríku timburhúsum. Á aðalgötunni Grand‘Rue er að finna fjölmargar verslanir, kaffihús og vínbúðir. Þar verður boðið upp á hádegisverð.
Síðan er frjáls tími til að skoða sig um áður en gengið er til baka á hótelið okkar.
Ekið að upphafsstað göngu í Keysersberg.
Gengið er í skógarhlíðum og á vínekrum milli fjögurra þorpa. Í einu þeirra (Katzental) bönkum við uppi hjá vínbónda sem fræðir okkur um framleiðsluna og gefur okkur að smakka á hinum ýmsu vínum. Gangan endar í Turckheim sem er lítill bær í hjarta Alsace Wine Route.
Þar verður gefinn frjáls tími til að skoða sig um og snæða hádegisverð áður en við ökum til baka á hótelið okkar.
Ekið til Colmar (30 mín), sem er ein fallegasta borg heims, oft lýst sem sprottin úr ævintýri.
Hún er rómuð fyrir vel varðveittan miðaldabæ sem slapp að mestu óskaddaður frá heimstyrjöldunum tveimur. Þar er að finna timburhús frá 14-17 öld, falleg torg, litlar verslanir og veitingahús. Frægasti hluti borgarinnar er Petite Venise (Litlu Feneyjar) með snotrum húsaröðum í pastellitum og litlar ár og síki sem hægt er að sigla um á bátum.
Eftir stutta gönguferð í miðbænum tekur við frjáls tími til að snæða hádegisverð og skoða sig um og njóta alls þess sem þessi einstaka borg hefur uppá að bjóða.
Ekið til Ribeauville þar sem ganga dagsins hefst. Við byrjum á að ganga til Notre-Dame de Dusenbach, sem er sögufræg kirkja og pílagrímastaður í Vosges fjöllunum ofan við bæinn.
Eftir að hafa skoðað okkur um þar höldum við áfram að köstulunum þremur (Chateau de Saint Ulrich, Chateau du Haut Ribeauville og Chateau du Girsberg) sem gnæfa yfir Ribeauville. Kastalarnir voru byggðir á 11-13 öld og voru eign Ribeaupierre ættarinnar sem réðu yfir vínekrum, vínræktun og verslun á svæðinu.
Þaðan er gengið niður til Ribeauville. Ekið þaðan á hótelið okkar.
Gengin hringleið frá hótelinu.
Gengið í skógarjaðri og gegnum vínekrur til Keysersberg, sem er eitt af þessum frægu Alsace þorpum með vel varðveittum og fagurlega skreyttum timburhúsum. Þar ætlum við að skoða okkur um og snæða hádegisverð.
Göngum síðan til baka á hótelið.
Ekið norður til Strasbourg, höfuðborgar Alsace.
Við byrjum á að fara í siglingu á ánni iII sem rennur í gegnum miðborgina. Síðan tekur við frjáls tími til að skoða sig um í borginni. Borgin hefur að geyma eina frægustu gotnesku dómkirkju í Evrópu sem lengi var hæsta bygging heims með sínum gríðarháa turni. Miðbærinn er sögufrægur og mjög fallegur, með þröngum götum, síkjum og tréhúsaarkitektúr.
Seinnipartinn er ekið til baka á hótelið okkar.
Ekið til Zurich flugvallar. Flug FI569 kl. 14:00 og lent á Keflavíkurflugvelli kl. 16:00.
Hvað er innifalið
- Áætlunarflug Icelandair KEF-ZRH
- Áætlunarflug Icelandair ZRH-KEF
- Ein taska max 23 kg & 10 kg handfarangur
- Flugvallarskattar
- Gisting í 7 nætur með morgunverði
- 4 kvöldverðir
- 3 hádegisverðir
- Vínsmakk
- Allur akstur skv. dagskrá
- Sigling í Strasbourg
- Íslensk fararstjórn
- Innlend fararstjórn á gönguleiðum
- Skattar & lögboðin tryggingagjöld
Ekki innifalið
- Ferðatryggingar
- 3 kvöldverðir
- 3 hádegisverðir
- Drykkir með mat
- Þjórfé fyrir bílstjóra
Snorri Guðmundsson
Helga Unnarsdóttir
Þær eru margar skemmtilegar minningar úr ferðunum með Skotgöngu. En það sem stendur upp úr er að hafa fengið að kynnast fjölskyldunni. Þau gefa svo mikið af sér og hafa lag á að láta öllum líða vel í kringum sig.
Ég hef farið í 8 eða 9 ferðir með Skotgöngu hver annari betri, væntumþykjan og vináttan er ólýsanleg. Það hefur verið mikil gleði að kynnast Ingu og Snorra.
Mér finnst ég ríkari eftir að hafa kynnst Ingu og fjölskyldu og vona að ég eigi oft eftir að feta margar gönguslóðir með þeim. Þau eru öll sem eitt boðin og búin að gera allt fyrir göngugestina sem hægt er.
Algengar spurningar
Veðrið er oftast milt og þægilegt yfir daginn en næturnar geta verið svalar - gott að hafa með léttan jakka eða síðbuxur ef farið er út á kvöldin. Vegna mögulegrar rigningar er gott að hafa regnföt og/eða regnhlíf með.
Meðal hæsti hiti 24 gráður á daginn og 13 gráður á nóttunni.
Göngustígar eru að mestu góðir, s.s. malarstígar og skógarstígar en það er líka malbik á milli.
Það er hægt að ganga hluta leiðar á þremur af fjórum göngudögum. Eins er hægt að taka sér frídag hvenær sem er í ferðinni.
Hôtel De La Couronne***
Heillandi gistihús í hjarta Riquewihr, hótelið skiptist í 3 byggingar þ.a. það er annaðhvort dvalið í því gula, appelsínugula eða bláa.
Hvert herbergi hefur baðherbergi með sturtu eða baðkari, fataskáp eða kommóðu, síma, sjónvarpi, viftu eða loftkælingu og hárblásara. Hægt að fá straujárn og strauborð í móttöku.
Hótelið býður upp á Wi-Fi tengingu að kostnaðarlausu.
Því miður er ekki hægt að vera 3 saman í herbergi. Þau sem ferðast 3 saman geta sent inn beiðni um að fá herbergi hlið við hlið.
Skotganga (Scot Walks Ltd) er ferðaþjónustufyrirtæki í Skotlandi, UK.
Ef einhver kemst ekki í þá ferð sem viðkomandi hefur bókað í, er ekki hægt að fá endurgreiðslu á innáborgun né færa innáborgun yfir á aðra ferð. Við mælum með því að fólk skoði forfallatryggingar sem tengjast kredikortum sínum eða skaffi sér sérstaka ferðatryggingu.
Þátttaka í hópbókun krefst að minnsta kosti 10 farþega. Ef lámarksþáttaka næst ekki, gilda reglur og skilyrði hópsins ekki lengur.
Farangursheimild, ein taska sem vegur 23 kg og handfarangur 10 kg er innifalin.Hópurinn þarf að hefja ferð saman en farþegar geta breytt heimför gegn breytingargjaldi. Breyting verður að gerast áður en flugmiði er gefinn út.
Ef þátttakandi bókar ferðina með röngu nafni, getur Icelandair krafist nafnabreytingar gegn ákveðnu gjaldi.
Þar sem um hópbókun er að ræða þurfa allar breytingar og aðrar fyrirspurnir varðandi flug að fara í gegnum Skotgöngu.
Það er því miður ekki lengur möguleiki að nota vildarpunkta og gjafabréf í hópbókun með Icelandair. Þeir sem vilja nota vildarpunkta geta valið að kaupa sitt flug sjálfir á heimasíðu Icelandair.
Hægt er að kaupa flugið út í hópbókun en ekki er hægt að kaupa flug fyrir heimferð eingöngu.
Lokagreiðsla á ferð er 10 vikum fyrir brottför. Þátttakendur munu fá tilkynningu þegar kemur að lokagreiðslu.
Næstu ferðir
